រាជរដ្ឋាភិបាលកម្ពុជា តំណាងដោយក្រសួងរ៉ែ និងថាមពលបានកំណត់គោលដៅអភិវឌ្ឍន៍អគ្គិសនីភាវូបនីយកម្មជន​បទ ដូចខាងក្រោម៖

១-ដល់ឆ្នាំ២០២០ ភូមិ​ទាំងអស់ទូទាំងព្រះរាជាណាចក្រកម្ពុជា នឹងមានអគ្គិសនីប្រើ​ប្រាស់ពីប្រភព​ផ្សេងៗ និង

២-ដល់ឆ្នាំ២០៣០ យ៉ាង​ហោច ៧០% នៃ​គ្រួសារទាំងអស់​ទូទាំងព្រះរាជាណាចក្រកម្ពុជា​នឹងមានអគ្គិសនីដែល​មានគុណភាព​ដូចអគ្គិសនី​ពី​បណ្ដាញ​ជាតិ​​ប្រើប្រាស់។

អគ្គិសនីកម្ពុជាតាមរយៈនាយកដ្ឋានមូលនិធិអគ្គិសនីភាវូបនីយ​​កម្ម​ជន​បទនៅទីនេះ គឺដើម្បី៖ ១- ជួយដល់គ្រួសារក្រីក្ររស់នៅតំបន់ជនបទអាចទទួលបានការតភ្ជាប់​ចរន្ត​​អគ្គិសនី​ពី​ប្រព័ន្ធផ្គត់ផ្គង់អគ្គិសនី ដោយផ្តល់​បា្រក់កម្ចីអនុគ្រោះគ្មានការបា្រក់​ឲ្យ​​គ្រួសារជនបទខ្ចីយកទៅតភ្ជាប់​ចរន្ត​​អគ្គិសនី ប្រើប្រាស់ ២- ជួយឲ្យ​គ្រួសារ​​​ជន​បទ​​​​រស់នៅតំបន់ដាច់ស្រយាលដែល​ខ្សែបណ្ដាញអគ្គិសនីមិនទាន់អាចពង្រីកទៅដល់ក្នុងរយៈពេលយូរ អាចទទួលបានអគ្គិសនីប្រើប្រាស់តាមរយៈ​ប្រព័ន្ធថាមពល​ពន្លឺ​ព្រះអាទិត្យតាមផ្ទះ ៣- ជួយទុនដល់អ្នកផ្គត់ផ្គង់អគ្គិសនី​ឯកជនសម្រាប់ពង្រីក និងកែលម្អការផ្គត់ផ្គង់អគ្គិសនីនៅតំបន់ជនបទ ដើម្បីឲ្យប្រជាពលរដ្ឋគ្រប់គ្រួសារនៅជនបទអាចភ្ជាប់ចរន្តអគ្គិសនីប្រើ​ប្រាស់តាមលទ្ធភាពរបស់ខ្លួន ៤- ជួយប្រជាពលរដ្ឋគ្រប់គ្រួសារទទួលបានអគ្គិសនីតម្លៃទាប ក្នុងក្របខណ្ឌនៃផែនការយុទ្ធសាស្ត្របន្ថយអត្រា និងគម្លាតថ្លៃលក់អគ្គិសនីនៅក្នុងព្រះរាជាណាចក្រកម្ពុជាសម្រាប់ឆ្នាំ២០១៥ ដល់ឆ្នាំ២០២០ តាមបណ្តាខេត្តនិងរាជធានី និង ៥- ផ្តល់ការផ្គត់ផ្គង់អគ្គិសនីតម្លៃទាបសម្រាប់បូមទឹកធ្វើកសិកម្ម។

នេះជាជំហានដ៏ធំមួយរបស់រាជរដ្ឋាភិបាលកម្ពុជាតាមរយៈអគ្គិសនីកម្ពុជាក្នុងការរុញ​ផ្លែផ្កានៃការអភិវឌ្ឍអគ្គិសនីឆ្ពោះទៅប្រជាពលរដ្ឋនៅជនបទ ដើម្បីជំរុញការអភិវឌ្ឍនៅតំបន់ជនបទ ដោយផ្តល់លទ្ធភាពឲ្យប្រជាជនក្រីក្រនៅតំបន់ជនបទកាន់តែច្រើនគ្រួសារមានអគ្គិសនីយកទៅប្រើប្រាស់សម្រាប់បំភ្លឺ ប្រកបរបរអាជីវកម្ម សិប្បកម្ម និងប្រើជាផលប្រយោជន៍ដទៃទៀត ដើម្បីលើកកម្ពស់កម្រិតជីវភាពរស់នៅរបស់ប្រជាពលរដ្ឋ ក៏ដូចជាដើម្បីជាផលប្រយោជន៍ទូទៅដល់សង្គមជាតិ។